सातारा : मंत्रिमंडळ अस्तित्वात आल्यापासून पालकमंत्रीपदाच्या सुरू झालेल्या चर्चेला अखेर मागील आठवड्यात ब्रेक लागला अन् सातारा जिल्ह्याचा पालकमंत्रीपदी पुन्हा एकदा ना. शंभूराज देसाई यांची निवड करण्यात आली. नुकतेच चार दिवसांपूर्वी ना.शंभूराज देसाई यांचे सातारा जिल्हा व शहरात शिवसैनिकांनी जोरदार स्वागत केले. त्यांच्या स्वागतासाठी सातारा शहरात शिवसैनिकांनी अनेक ठिकाणी बॅनर लावले. मात्र ते बॅनर विनापरवानगी असल्याचे कारण समोर करत पालिकेने चार दिवसांनी ते बॅनर हटविले आहेत.
दरम्यान, पालकमंत्रीपदाची जेव्हा चर्चा सुरू झाली होती. तेव्हा ना. शिवेंद्रसिंहराजे भोसले यांचे नाव सर्वाधिक चर्चेत होते. मात्र, ना.शंभूराज देसाई यांची निवड करण्यात आल्यानंतर ना.शिवेंद्रसिंहराजे भोसले समर्थकांमध्ये नाराजी निर्माण झाली होती तर जिल्हा बँकेच्या संचालिका कांचन साळुंखे यांनी आंदोलन करण्याचा इशारा देखील दिला होता. परंतु अखेर ना.शिवेंद्रसिंहराजे भोसले यांनी पालकमंत्री पदाचे अधिकार मुख्यमंत्र्यांना असल्याचे सांगून विषयावर पडदा टाकला. परंतु तब्बल चार दिवसानंतर पालकमंत्री शंभूराज देसाई यांचे सातारा शहरातील बॅनर बेकायदेशीर असल्याचा साक्षात्कार पालिकेला होण्यामागे राजकीय ट्विस्ट असल्याची चर्चा सध्या सातारा शहरात सुरू असल्याचे समोर येत आहे.
कोणत्याही टिप्पण्या नाहीत:
टिप्पणी पोस्ट करा